Mahinda Rajapaksa: මොබිටෙල් මගින් Mahinda.info වරින් වර තහනම් කිරීම.

Sunday, September 13, 2015

මොබිටෙල් මගින් Mahinda.info වරින් වර තහනම් කිරීම.

රජයට අයත් මොබිටෙල් සමාගම විසින් Mahinda.info වෙබ් අඩවිය කලින් කලට වාරණය කරනු ලැබේ. නමුත් ඒ ගැන අධිකරණ ක්‍රියාමාර්ගයක් ගැනීමට යාමේදී හෝ අන්තර්ජාලයේ පළ කළ වහාම එම වාරණය ඉවත් කරයි.

මාස කිහිපයකට පෙරාතුව සිට මොබිටෙල් මගින් mahinda.info වාරණය කර තිබුණි. පසුගිය ඡන්ද වකවානුවේදී අප මැතිවරණ කොමසාරිස්වරයාට පැමිණිලි කළ පසුව අදාල පැමිණිල්ල පසු දින විභාග කිරීමට පෙර එම වාරණය ඉවත් කෙරුණි. මැතිවරණයට පසුව නැවතත් මොබිටෙල් මගින් වාරණය කර තිබේ.

අද දින colombo telegraph වෙබ් අඩවියෙන් මෙම වාරණය ගැන ලිපියක් පළ කර ඇත. ඒ සමගම වාරණය ඉවත් කිරීමට මොබිටෙල් සමාගමේ අදාල නිලධාරීන් කටයුතු කර තිබේ.

නමුත් වාරණය ඉවත් කිරීමට පෙර අපගේ සහෘදයෙක් විසින් මොබිටෙල් පාරිභෝගික සේවා අංශය අමතා පහත හඬ පටය එවා තිබුණි.



දින කිහිපයකින් මේ උණුසුම මැකී ගිය විට මොබිටෙල් විසින් නැවතත් mahinda.info වාරණය කරනු ඇත.

මෙම වෙබ් අඩවියෙන් අප ඉලක්ක කර ඇත්තේ අන්තර්ජාලයේ පිළිගත් මූලාශ්‍ර මත පමණක් තීරණ ගන්නා උගත් බුද්ධිමත් ජනතාවය. ඔවුන්ට වඩාත් පහසුවෙන් web proxy භාවිතා කර මෙයට පිවිසීමට හැකිය.

එහෙත් මොබිටෙල් සමාගම විසින් mahinda.info වෙබ් අඩවිය වරින් වර වාරණය කිරීම හරහා වත්මන් යහපාලන ආණ්ඩුව විසින් සිදු කරන මාධ්‍ය මර්දනය මධ්‍යස්ථ ජනතාව වෙත වඩාත් පහසුවෙන් සන්නිවේදනය වී තිබේ.

ත්‍රස්තවාදයට අනුබල දීම වැළැක්වීම යටතේ පසුගිය කාලයේ තහනම් කර තිබූ කොටි සංවිධානයේ ටැමිල්නෙට් වෙබ් අඩවිය ඇතුළු කොටින්ට සහය දක්වන අනෙකුත් වෙබ් අඩවි ගණනාවක්ම යළිත් විවෘත කර ඇත. ඒ අතර කොටි ත්‍රස්තවාදය මෙරටින් අතුගා දැමූ මහින්ද රාජපක්ෂ මහතා වෙනුවෙන් ඇති වෙබ් අඩවිය වාරණය කිරීම මගින් වත්මන් ආණ්ඩුව කටයුතු කරන්නේ කවුරුන් වෙනුවෙන්දැයි පැහැදිළි වෙයි.