Mahinda Rajapaksa: Mahinda.info වෙබ් අඩවිය නැවතත් ඔබ හමුවට...

Saturday, April 9, 2016

Mahinda.info වෙබ් අඩවිය නැවතත් ඔබ හමුවට...



මහින්ද රාජපක්ෂ මැතිතුමාට එරෙහිව අන්තර්ජාලයේ දියත් වූ සාහසික මඩ කන්දරාවට පිළිතුරු දීමේ අවශ්‍යතාවය පෙරදැඩි කරගනිමින් ආරම්හ කළ mahinda.info වෙබ් අඩවිය 2015 පෙබරවාරි මුල් භාගයේ සිට වසර අවසානය දක්වා එම යුතුකම උපරිමයෙන් ඉටු කිරීමට උත්සාහ දැරීය. ඒ සඳහා වෙබ් අඩවියේ කාර්යමණ්ඩලය මෙන්ම, වෙබ් අඩවියේ ලිපි සමාජ ජාල ගිණුම් මගින් "Share" කළ දහස් සංඛ්‍යාත හිතවතුන් සහ හිතවතියන්ගේ අප්‍රතිහත ධෛර්යය ඉවහල් විය.

විරුද්ධවාදී කණ්ඩායම් විසින් අන්තර්ජාලයේ සිදුකළ සංවිධානාත්මක චරිත ඝාතනයන් ඔබ අප සියල්ලන්ගේම වෑයම ඉදිරියේ තවදුරටත් පවත්වාගැනීමට නොහැකි බව දැනෙද්දී ඔවුන් සිදුකළේ සුපුරුදු මර්දනය ක්‍රියාත්මක කිරීමයි.

මොබිටෙල් මගින් mahinda.info වෙබ් අඩවිය ශ්‍රී ලංකා අන්තර්ජාල ග්‍රාහකයන්ට වාරණය කිරීමෙන් නොනැවතී වෙනත් අන්තර්ජාල සේවා සපයන්නන් හරහාද වාරණය කිරීමට යහපාලකයින් වරින් වර උත්සාහ දැරීය. මහින්ද රාජපක්ෂ ජනාධිපති තුමාගේ කාලය තුළ සිංහල කොටින්ගේ වෙබ් අඩවි වාරණය සිදුවුණොත් සිදුවුණේ අධිකරණ නියෝගයකට අනුව වුවද, mahinda.info වෙබ් අඩ්වියට එරෙහි කිසිදු අධිකරණ නියෝගයක් තියා පැමිණිල්ලක්වත් නොමැති වීම විශේෂත්වයක් විය.

mahinda.info වෙබ් අඩවිය ආරම්භ කළ දා පටන් අති විශාල සයිබර් ප්‍රහාරයන්ට ලක් වුණි. ඒවායින් වෙබ් අඩවිය රැක ගැනීම සඳහා විශාල කාලයක් සහ වියදමක් දැරීමට සිදු විය. වෙබ් අඩවියේ ආරක්ෂාව ගැන සිතීම ලිපි ලිවීමට වඩා ප්‍රමුඛ කර්තව්‍යය වී තිබුණි.

එපමණක් නොව මෙම වෙබ් අඩවියට සම්බන්ධ පිරිස් වල ජීවිතාරක්ෂාව සම්බන්ධයෙන් බරපතල තර්ජන ඇති වූයේ යහපාලනයේ ස්වරූපය මොනවට කියා පාමිණි.

එවන් වාතාවරණයක් යටතේ අප වෙත එල්ල වෙමින් තිබූ පීඩනය සලකා බලමින් වෙබ් අඩවිය තාවකාලිකව වසා දැමූයේ උපක්‍රමිකව වඩාත් සංවිධානය වීමේ බලාපොරොත්තුවෙන් ය.

වෙබ් අඩවිය දිගටම පවත්වාගෙන යන ලෙසට අපගේ ආදරණීය සහෘදයන් විසින් විශාල ඉල්ලීම් ප්‍රමාණයක් අප වෙත යොමු කළ නමුත් එම අවස්ථාවේ වෙනත් විකල්පයක් අප වෙත ඉතිරිව නොතිබුණි.

මේ පවතින වාතාවරණය තුළ mahinda.info වෙබ් අඩවිය ආරම්භ කළහොත් එහි ලේඛකයන්ට එල්ල වී ඇති තර්ජන වඩාත් වැඩි වුවත්, අපගේ ජීවිත අවදානම නොසලකා හරිමින් මහින්ද රාජපක්ෂ මැතිතුමාගේ ජීවිත අවදානම සම්බන්ධයෙන් කටයුතු කිරීම රටේම අවශ්‍යතාවය බවට පත් වෙමින් තිබේ.

ජනතාව අතර සිටින නායකයෙක්ට ඝාතනය කිරීමට පෙර, සාහසිකයන් සිදුකරන්නේ හෙතෙමගේ චරිතය ඝාතනය කිරීමය. පසුගිය කාලයේ අරාබිකරයේ සිදුවූ සිදුවීම් අප අත් දුටුවෙමු. ඉතින් මහින්ද රාජපක්ෂ මැතිතුමාගේ ආරක්ෂාව ඉවත් කිරීමට උත්සාහ දැරීමෙන් නොනැවතී, එතුමාට එරෙහිව නැවතත් දිගින් දිගටම මඩ අවලාද එල්ල කරන්නේ හොඳකට නොවන බව කාටත් සක් සුදක් සේ පැහැදිළි වී තිබේ.

ශ්‍රී ලංකාවේ පවත්නා දේශපාලන ව්‍යාකූලත්වය හමුවේ රට දැනුවත් කිරීමටත්, මහින්ද රාජපක්ෂ මහතාට සහ එතුමාගේ සමීපතමයන්ට එරෙහිව එල්ල කරන මඩ අවලාද වලට පිළිතුරු දීම උදෙසාත් මහින්ද ඉන්ෆො වෙබ් අඩවිය නැවතත් පෙරට වඩා සංවිධානාත්මකව ආරම්භ කළ බව ඔබ වෙත සතුටෙන් පවසන්නෙමු.

"වඩා හොඳ හෙට දවසක්" බලාපොරොත්තු වෙන ඔබ අප සැමට, රටට ඉතිරි වී ඇති එකම බලාපොරොත්තුව වන මහින්ද රාජපක්ෂ මැතිතුමා වටා පවුරක් සේ ශක්තිමත් වීමට අප සැමට කාලය උදා වී තිබේ. පසුගිය වසරේදී අප වෙත සහයෝගය ලබා දුන් ඔබ සියලුම දෙනාට අපගේ හෘදයාංගම කෘතවේදීත්වය පළ කරන අතර, අද පටන් එම කාරුණික සහයෝගය නැවතත් ලබා දෙන මෙන ඉල්ලා සිටින්නෙමි.

- Mahinda.info Editor -