Mahinda Rajapaksa: ජනප්‍රිය සංවිධායකවරුන් ඉවත් කිරීම තුළින් ශ්‍රීලනිපය දෙකඩ කිරීම

Sunday, August 21, 2016

ජනප්‍රිය සංවිධායකවරුන් ඉවත් කිරීම තුළින් ශ්‍රීලනිපය දෙකඩ කිරීම

ශ‍්‍රීලනිපයේ සංවිධායකවරුන් කිහිප දෙනෙකුගේ සංවිධායක ධුර අත්හිටුවා නව සංවිධායකයින් පත් කිරීම සම්බන්ධයෙන් අදහස්ප පල කරමින් හිටපු ජනාධිපති මහින්ද රාජපක්‍ෂ මැතිතුමා විසින් නිකුත් කර ඇති මාධ්‍ය නිවේදනය මෙසේය.



ජනප්‍රිය සංවිධායකවරුන් ඉවත් කිරීම තුළින් ශ්‍රීලනිපය දෙකඩ කිරීම

ජනාධිපතිවරයා විසින් ශ්‍රී ලංකා නිදහස් පක්‍ෂයේ ආසන සංවිධායකවරුන් වූ මහින්ද යාපා අබේවර්ධන, පවිත්‍රා වන්නිආරච්චි, රෝහිත අබේගුණවර්ධන, සී.බී.රත්නායක, ගාමිණි ලොකුගේ හා කහෙළිය රඹුක්වැල්ල යන පාර්ලිමේන්තු මන්ත්‍රීවරුන්ද ඇතුළුව තවත් කීපදෙනෙකුම එම තනතුරු වලින් ඉවත් කර තිබේ. ඒකාබද්ධ විපක්‍ෂය සමඟ වැඩ කරන ශ්‍රී ලංකා නිදහස් පක්‍ෂ සාමාජිකයින්ගෙන් පළිගැනීමේ නවතම අදියර මෙයයි. මීට පෙර අවස්ථාවලදී දිලුම් අමුණුගම, එස්.එම්. චන්ද්‍රෙස්න, සාලින්ද දිසානායක, ගීතා කුමාරසිංහ, කංචන විජේසේකර හා ප්‍රසන්න රණතුංග ඇතුළු මන්ත්‍රීවරුන් පිරිසක්ද තම ආසන සංවිධායක ධූර වලින් නෙරපා හරිනු ලැබීය. පුත්තලම් දිස්ත්‍රික් පාර්ලිමේන්තු මන්ත්‍රී සනත් නිශාන්තගේ පක්‍ෂ සාමාජිකත්වය පවා අත්හිටුවා ඇත. මේ දඩයම නිසා ශ්‍රී ලංකා නිදහස් පක්‍ෂය දැනටමත් දෙකඩ වී ඇත.

ශ්‍රී ලංකා නිදහස් පක්‍ෂයේ විශාල ජන පදනමක් ඇති සංවිධායකවරුන් ඉවත් කොට අඩු ජන පදනමක් ඇති පුද්ගලයන් එම තනතුරුවලට පත් කිරීමෙන් ශ්‍රී ලංකා නිදහස් පක්‍ෂය දුර්වල කිරීමත් එක්සත් ජාතික පක්‍ෂයට වාසිදායක තත්වයක් ඇති කිරීමත් නිරායාසයෙන්ම සිදු වේ. පක්‍ෂ සාමාජිකත්වය අත්හිටුවා ඇති සනත් නිශාන්ත මන්ත්‍රීවරයා පුත්තලම් දිස්ත්‍රික්කයේ සියලුම දේශපාලන පක්‍ෂ අතරින් වැඩිම මනාප ලබාගත් දේශපාලඥයායි. ඉවත් කොට තිබෙන ආසන සංවිධායකවරුන්ගෙන් බොහෝ දෙනෙක් තමන්ගේ දිස්ත්‍රික්කවල වැඩියෙන්ම මනාප ඡන්ද ලබාගත් කීප දෙනා අතර සිටි. උදාහරණයක් වශයෙන් ප්‍රසන්න රණතුංග ගම්පහ දිස්ත්‍රික්කයේ පළවෙනියා විය. දිලුම් අමුණුගම මහනුවර දිස්ත්‍රික්කයේ තුන්වෙනියා විය.

එස්.එම්. චන්ද්‍රෙස්න අනුරාධපුර දිස්ත්‍රික්කයේ පළමුවෙනියා විය. රෝහිත අබේගුණවර්ධන කළුතර දිස්ත්‍රික්කයේ දෙවෙනියා විය. මහින්ද යාපා අබේවර්ධන මාතර දිස්ත්‍රික්කයේ තුන්වෙනියා විය. සී.බී. රත්නායක නුවරඑළිය දිස්ත්‍රික්කයේ ආරුමුගන් තොණ්ඩමන්ට පසු දෙවෙනියා විය. පවිත්‍රා වන්නිආරච්චි රත්නපුර දිස්ත්‍රික්කයේ තුන්වෙනියා විය. මේ සියලු දෙනාම තම දිස්ත්‍රික්කවල ජනප්‍රිය දේශපාලඥයින් වෙනවා පමණක් නොව ශ්‍රී ලංකා නිදහස් පක්‍ෂයේ බල කණුද වේ. පසුගිය පාර්ලිමේන්තු මැතිවරණයේ සිට අද දක්වා පක්‍ෂ මධ්‍යම කාරක සභාවේ සාමාජිකයන්ද 17 දෙනෙකු නෙරපා හැර තිබේ.

මුළු රටම හඳුනන මෙවැනි පුද්ගලයින් වෙනුවට නව ආසන සංවිධායකවරුන් හැටියට පත් කොට තිබෙන්නේ එක්කො පරාජිත අපේක්‍ෂකයන් නැත්නම් පළාත් සභා මට්ටමින් පවා අඩු මනාප සංඛ්‍යාවක් ලබා ගත් අපේක්‍ෂකයන්ය. මේ ආකාරයට ජනප්‍රිය සංවිධායකවරුන් ඉවත් කොට ශ්‍රී ලංකා නිදහස් පක්‍ෂය දෙකඩ කිරීමේ වගකීම අවසානයේදී පක්‍ෂ නායකයා වන ජනාධිපතිවරයාට බාර ගැනීමට සිදු වනු ඇත. අපි මේ දකින්නේ ශ්‍රී ලංකා නිදහස් පක්‍ෂය විනාශ කිරීමේ දෙවෙනි අදියරයි. පළමු අදියර වූයේ ශ්‍රීලනිපය විසින් පාලනය කරනු ලබන සියලුම පළාත් පාලන ආයතන විසුරුවා හැරීමයි. මේ පළාත් පාලන ආයතන තිබුණේ නම් ඕනෑම මැතිවරණයකදී ඒවා ශ්‍රී ලංකා නිදහස් පක්‍ෂයට විශාල පිටුවහලක් වනු ඇත.

පළාත් පාලන ආයතන විසුරුවා හැරීමෙන් පැහැදිලි වාසියක් එජාපයට අත් වූ බව අවිවාදාත්මකය. එජාපය හා ශ්‍රිලනිපය අතර හවුල් ආණ්ඩුවේ කාලය අවුරුදු දෙකේ සිට පහ දක්වා වැඩි කරනු ලැබුවේද පක්‍ෂයේ මධ්‍යම කාරක සභාවෙන් හෝ විධායක සභාවෙන් හෝ අඩුම වශයෙන් ආණ්ඩුව සමඟ සිටින ශ්‍රීලනිප පාර්ලිමේන්තු කණ්ඩායමෙන්වත් නොවිමසාය. එජාපයට වාසිය ලබා දීම සඳහා ගන්නා මේ පියවරයන් ඉතා සාවධානව නිරීක්‍ෂණය කරන මෙන් මම සියලුම ශ්‍රී ලංකා නිදහස් පාක්‍ෂිකයන්ගෙන් ඉල්ලා සිටිමි.

තවත් අයටත් බලන්නට "Share" කරන්න.

2 comments:

  1. ජනපති ශ්‍රීලනිපය මුලුමනින්ම පාවා දුන්නා 2014 අග භාගයේදී එජාපය හා එක්වී තම අභිමතාර්ථ පමණක් සිතා එජාපය හා එක්වී ජනාධිපති අපේක්ශක වූ දිනයේ! එදා අපේ මහින්ද මැතිඳුන් ලඟ නොසැලී සිටි ලක්ශ 58 තමයි එතුමාගේ සුපිරිසිදු ශ්‍රීලනිප චන්ද පදනම. අද එය ලක්ශ ගණනාවකින් වැඩි වෙලා.

    ජනපති සිරිසේන ආත්මාර්ථකාමී දේශද්‍රෝහී දේශපාලනඥයින් නම්මා ගත්තත් එයා ලඟ ජනතාව නැහැ. ඒකයි පරම සත්‍යය. ඒ බව පැහැදිලිව සාක්ශාත් වෙනවා චන්දය පැවැත්වූවාම. බටහිරට ඉන්දියාවට දණ නමා ජනපති.... චන්ද්‍රිකා-රනිල් ඇතුලු යමපාලකයින් හා එකතු වී රණවිරු සහ මගේ මව්බිම ඉතා නින්දිත පහත් විදියට පාවා දෙමින් සිටී. දේශද්‍රෝහී අතුරුදහන් පනත සම්මත කරගත්තේ බටහිරයන් කොටි හිතවාදීන් සතුටු කරන්න...තනිකරම රට බේරූ අපේම රණවිරුවන් දඩයමටයි.

    සුලු ජාතීන් සහ කොටි හිතවාදී ඩයස්පෝරා පමණක් සතුටු කරමින්...සිංහල බෞද්ධයින් කුණු කූඩෙට වීසි කර ඇත. වසර දහස් ගණනක ප්‍රෞඩ ඉතිහාසයකට උරුමකම් ඇති අසිරිමත් "බුදුදහමට හිමි ප්‍රමුඛත්වය දී ආරක්ශා කිරීම" ව්‍යවස්තාවෙන්ම අයින් කර අපේ උරුමය වන සිංහල බෞද්ධ රාජ්‍යය සහමුලින්ම විනාශ කර "අනාගමික රාජ්‍යයක්" කිරීම සඳහා කෙටුම්පත් සකස් කර හමාරයි!

    ඒ සියල්ල සිදුවෙද්දී ජනපති මහා පින්කම් බලෙන් සූදානම් කර ථේරවාදී බුදු දහමෙහි ඛේන්ද්‍රස්ථානයක් බවට මේ රට පත් කරනවා කියලා ජනතාව රවටන්න "පට්ට කෙබර" අත හරියි! ථේරවාදී බුදුදහමෙහි ඛේන්ද්‍රස්ථානය මේ රට තමයි. එය සිදුවෙලා බොහෝ කලක් ගතවුනා ත්‍රිපිටිකය ග්‍රන්ථාරූඪ කල කාලයේ පටන්.

    ජනපති මේ රවටන්නේ වනසන්නේ තම දරුවන් මෙන් ආරක්ශා කල යුතු රටවැසියා නේද? පක්ශය මුලුමනින්ම වැනසූ කෙනාට ජනතාව අනතුරේ දාන එකත් කජ්ජක්ද? ශ්‍රීලනිප සුපිරිසිදු චන්ද අපේ මහින්ද මැතිඳුන් ලඟ නොසැලී සිටී! ජයෙන් ජයම වේවා!

    ReplyDelete
  2. බටහිරට, ඉන්දියාවට සහ කොටි පරපුරට ගැති වී රට පාවා දෙමින් අපේම වීරෝධාර රණවිරුවන් පාවා දෙමින් එජාපය හා දීග කන ජනපති මෛත්‍රී ඇතුලු හෙන්චය්යන් සිටින තාක් කල් ඉතින් නම් සම්ම ජාතියේ අපේ පාරම්පරික ආඩම්බර චන්ද ශ්‍රීලනිපයට නොලැබේ! ජනබලය අපේ ගරු මහින්ද රාජපක්ස මැතිඳුන් සහ සැබෑ දේශප්‍රේමීන් සමඟයි! ජයෙන් ජයම වේවා!

    ReplyDelete

අදහස් දැක්වීමේදී ඔබගේ නම දැක්වීමට "Comment as" ඉදිරිපස ඇති "Drop down menu" එකෙන් "Name/URL" ‍තෝරා ඔබගේ නම ඇතුළත් කරන්න.